segn duada ollas
und ea head a a jedes wuat
wauna wos ned midgriagd
gähd’s eam iwahaupt ned guad

sei tia hod a guckal
ohne des kennt a ned sei
wäu bei jedn klaan muckal
isa imma live dabei


ea kennt jo wos vasama
es kennt eam wos entgeh
vo nix z´wissen wara drama
neigia is hoid sei metje


losst wea im haus an schaas
hoda sicha sei nosn drin
wauna iagendwos ned was
hod es lem fia eam kaan sinn

head ea a sirene
blinkt dazua a blaues licht
isa gaunz in da domäne
wäu do wittert ea a gschicht


ea kennt jo wos vasama
es kennt eam wos entgeh
vo nix z´wissen wara drama
neigia is hoid sei metje


(nowemba 2009)

© bei da elis rotter

weu mia lossn seah vü göd in da trafik
olle passivraucha haum auf uns an pick
trozdem rauch ma olle weida tschik um tschik

rauchn, mia woin rauchn

waun mia rauchn kenna sama gaunz im glick
weu des gibt uns soan gaunz besondan kick
und drum rauch ma olle weida tschik um tschik

jo mia gengan gean wos trinkn
aundre sogn des is a tick
auwa zu an guadn glasl jo
do ghead a gscheide tschik

und mia gehn a gean wos essn
maunche sogn des is ned schick
auwa noch an guadn pappal jo
do rauch ma gean an tschik

rauchvabot
iwaroi nua rauchvabot
mia woin ka rauchverbot
na, mia woin olle weida - rauchn

mia woin rauchn

waun mia rauchn kenna sama gaunz im glick
weu des gibt uns soan gaunz besondan kick
und drum rauch ma olle weida tschick um tschik


Text © by Elis Rotter (Nach der Melodie zu: cheek to cheek - by Irving Berlin)

mei oida is iwa de heisa
mei oida dea kummt nimmameha
mei oida is iwa de heisa
warum nur kränkt mi des ned seha

mei oida dea håd jez a neiche
mei oida dea denkt ned aun mi
mei oida dea håd jez a neiche
gaunz sicha sekkieada jez sie

bringds ma, bringds ma
oh bringds ma mein oidn
ned zruck, ned zruck
bringds ma bringds ma
oh bringds ma mein oidn
ned zruck

mei oida håd seha große schuidn
mei oida dea håd nia a göd
mei oida håd seha große schuidn
wås glaubds warum ea mia ned föhd

mei oida håd jen tåg an fezn
mei oida is imma marod
mei oida håd jen tåg an fezn
na, um den oidn is ma ned schod

bringds ma, bringds ma
oh bringds ma mein oidn
ned zruck, ned zruck
bringds ma bringds ma
oh bringds ma mein oidn
ned zruck

mei oida håd fåst nie a håckn
mei oida dea wü nie wås duan
mei oida håd fåst nie a håckn
aun dem håb i echt nix faluan

mei oida dea kaun nua bis 3 zöhn
mein oidn famiss i ned fü
mei oida dea kaun nua bis 3 zöhn
frågds ned, owin zruck håbn wü

bringds ma, bringds ma
oh bringds ma den oidn
ned zruck, ned zruck
bringds ma bringds ma
oh bringds ma den jå
nimma zruck

(frei nach dem alten englischen Kinderlied
„My bonnie is over the ocean“ )

Text © by elis rotter

håb ghead er kaun guad singa
håb ghead er håd an dreif
då bini hie gfoan
sowos gib i ma gean leif

jå und då woa des biaschal
a völlich fremda mau

bualt mim finga in´d wundn
singt mei hoibs lem in sein liad
wiagd mi gaunz saunft mit sein liadl
wiagd mi gaunz saunft
mit sein liadl
dazöd ma mei lebn
in sein liadl
wiagd mi gaunz saunft
mit sein liad

håb glaubt mi trifft da schlåg
vua oi de aundan leit
a gfüh ois kennad dea mi
scho seit launga zeit

håb bet dassa boid aufhead
doch er håd weida gmåcht

bualt mim....

håd gsungan aus mein lebn
woa direkt peinlich scho
daun håda durchgschaut
durch mi
ois warad i ned då

doch er woa då, der fremde
des a no laut und kloa

bualt mim finga...


(frei nach „killing me softly“ von Roberta Flack)

© by elis rotter

waun du daun bist und suagn håst
und du brauchast a bissl hüüf
und goanix goanix im lem gäht guad

schliaß de augn und denk aun mi
und scho bin i bei dia
i hoid di fest und streichl de ängste fuat


jå du ruafst afoch noch mia
und du waaßt, glei bini bei dia
glei kumm i grennt wo a imma i bin

winta heabst fruahjoah und summa
imma wea i zu dia kumma
waunst mi brauchst, jå i kumm
du bist ned alaa

waun da himme schiach und grau is
und da nordwind di owe zaht
wauns koid is und nix mea di weama kau

daun nimm dei gscheides biachl
und ruaf mi afoch au
wiast seng in null komma nix bini då

jå du ruafst afoch noch mia
und du waaßt, glei bini bei dia
glei kumm i grennt um di wieda zum segn

winta …

is ned guad dassd waaßt
du håst an freind
waund leid wieda goaschtig san
wauns di aufåeun und wauns di håssn
doch du brauchst di ned aufåeun låssn
wåeu du bist ned alaa

jå du ruafst afoch noch mia....


© by elis rotter (frei nach Carol King)

waun du fuat gäh wüsd
gäh hoid fuat
waunsd no duat bleim wüsd
bleib no duat

es gibt 1000 wege zu lem
du muaßdas nua gem

waunsd alaa bleim wüsd
bleib alaa
waunsd zu zweit sei wüsd
deafsd des aa

es gibt 1000 oatn zu lem
du muaßdas nua gem



du kaunsd duan wås du wüüsd
ålle wege san frei
du muaßd nua gschpian wås du füüsd
und daun schlågsdas a ei

entweda du måchsdas woah
oda schmiasdas ind hoa

es gähd – is iisi –
du brauchsd nua woin



waun du bled sei wüßd
daun sei bled
waunsdas ned sei wüsd
seis hoid ned

es gibt 1000 wege zu lem
du muaßdas nua gem

waunsd an schmäh håm wüsd
måch an schmäh
aa waunsd ned låchn wüsd
bist ka wäh

es gibt 1000 oatn zu lem
du muaßdas nua gem



du kaunsd duan wås du wüüsd
ålle wege san frei
du muaßd nua gschpian wås du füüsd
ud daun schlågsdas a ei

entweda du måchsdas woah
oda schmiasdas ind hoa

es gähd – is iisi –
du brauchsd nua woin




© by elis rotter (frei nach cat stevens „if u want to be free, be free“)