olle redn
üba weate

wichtige

jo, sogoa
üba-lebens

wichtige
weate

glaubst san damit
de leba-weate
gmaand?

(mei 2010)

© bei da elis rotter

imma wieda
find si wea
auf den ma
hiehaun kau

nua damid ma
de eiganan
blaun fleckn
ned zöhn
muaß


(mei 2010)

(c) bei da elis rotter

taktisch
taktvoll

intakt
im takt

tak tak tak

(september 2009)

© by elis rotter

sie sogt:
bitte wehr di doch endlich
loss da ned ois gfoin
du host rechte
du bist stoak

- owa du bist psychisch völlich am saund…

sie sogt:
des gibt’s do ned
dass du afoch
in da eckn sitzn bleibts

dass du di imma nua
duckst

- owa du bist wia gelähmt vua aungst…

sie sogt:
es kaun do ned sei
dass du nie zruckhauts
ned um hüfe schreist

dass du ollas so hinnimmst

- owa du bist innalich scho zabrochn…

sie frogt:
wiaso stähsd du - vadaumt noamoi - ned auf
und duads endlich wos dagegn?

und sie siecht afoch ned
wia miad du bist


(mäaz 2009)

© bei da elis rotter

das opfer fällt nicht weit
vom stamm

von dort rollt es
in die opferrolle

rollt weiter in
die spirale

an deren ende bereits
neue opfer sitzen

dann wird geopfert
oder aufgeopfert

je nachdem


(März 2009)

© by Elis Rotter

a rathausfrau woins
asoa schwochsinn!

haum de kane aundan suagn
de greanan weiba…

de soin liawa leana
wia ma büllicha kocht

bei dera wiatschoftsloge

de kennan froh sein
wauns iwahaupt hackln geh diafn

bei dera oabeitsmoaktloge

a rathausfrau
do head si do ollas auf!

de hysterikarinnen
brauchn ka fraunsymbol
sondan an gscheidn mau
dea eana de wadln wieda viare richt

so schauts aus!


(februa 2009)

© bei da elis rotter und div. ForenschreiberInnen

waun ana in da schnö-baun den nothaumma
außareißt und eam - nur zum beispü -
an aundan aufn schädl haud
daun is des missbrauch
und dea wiad bestroft

- Missbrauch wird bestaft!
so stehts aufn pickal vom haumma

waun si ana a packl parkemed kaufd
und de puivaln in sei bia eine schmeißd
damits bessa foahd
daun is des missbrauch
und vua dem wird gewarnt

- Vor Missbrauch wird gewarnt!
so stehts am beipockzettl


und do hauma aa scho es problem:

in ana gsöschoft
in dea ma kinda gebrauchen kau
wira weakzeig oda a verkehrsmittl

do deaf ma si ned wundan
dass a poa oaschlecha glaubn
dass ma kinda aa missbrauchn kau


(novemba 2008)

© bei da elis rotter

maunchmoi denkima

de blindn sähgn
wenigsdns ned
dass augstarrt
wean

owa gspian duansas
woahscheinlich
trotzdem

(novemba 2008)

© bei da elis rotter

iha heats wåsi red
wissts aa mid wem
waunn und wo

iha lests meine mails
wissts aa aun wen
waunn und wieso

iha passts auf
wås i kauf
sechts
noch wås i lechz
soga am klo
kneißts iha mi å

i waaß
iha måchts eich vo mia
a richtiges büd

då hobi mi no nie
so sicha gfühd


(septemba 2008)

© bei da elis rotter

es is nämlich
gaunz egal

ob du
mi auschtarrst
peamanent wegschaust
oda ob du
so duasd ois dädasd
gaunz normal schaun

i füh mi
so oda so
von dia
diskriminiad


(august 2007)

© by da elis rotter