i kennt
eigendlich
ka schlechtes wuat
sogn

owa
i find aa
ka wuat
des guad
gnua
is

(mai 2009)

© bei da elis rotter

i wü kaan
reim
schleim
schpeim

drum
loss i´s
reim
schreim
bleim


(mai 2009)

© bei da elis rotter

raunzn, sudan, lamentian
üban tod sinnian

stänkan, audrahn, keppln
aundre busarian

siaßln, schleiman, buckln
hintrucks intrigian

einemischn, aufmischn, driba wischn
wem wos ume schmian

und nie dabei
des goidne wiena heaz
valian


© bei da elis rotter

wos mocht ma
wauns fia an schodn
afoch
ka begrenzung
gibt

wauna ausufad
wauna iwa gähd
wauna imma greßa
und greßa wiad

und du danem
a klans zweagal

eam ins aug schaun

des aug is owa
in ana hechn
desd nedamoi
mehr mid ana
lata daglengsd

und du wiasd migrissn
von ana wön
noch da
aundan

no hoidsd di
iagendwie hoid
hoidsd di
es hoit di

hoit!!!

(aprü 2009)

des is ois

a trauagschpü
a drama
a tragödie

vielleicht aa a
tragigkomödie

wea waaß…


na egal

auf jedn foi
sitz i
im foischn
füm

(april 2009)

© bei da elis rotter

hängt ma scho
bei de uahn außa
schimpft da hos

es gäht ma sowos von
aufn keks
am zaga
auf de sockn
am oasch
…

mia gäht’s eigentlich
nua auf de eia
sogt es hendl

(aprü 2009)

© bei da elis rotter

sie sogt:
bitte wehr di doch endlich
loss da ned ois gfoin
du host rechte
du bist stoak

- owa du bist psychisch völlich am saund…

sie sogt:
des gibt’s do ned
dass du afoch
in da eckn sitzn bleibts

dass du di imma nua
duckst

- owa du bist wia gelähmt vua aungst…

sie sogt:
es kaun do ned sei
dass du nie zruckhauts
ned um hüfe schreist

dass du ollas so hinnimmst

- owa du bist innalich scho zabrochn…

sie frogt:
wiaso stähsd du - vadaumt noamoi - ned auf
und duads endlich wos dagegn?

und sie siecht afoch ned
wia miad du bist


(mäaz 2009)

© bei da elis rotter