i wü kaan
reim
schleim
schpeim

drum
loss i´s
reim
schreim
bleim


(mai 2009)

© bei da elis rotter

es große glick
waun ma bewusst wiad
dass ma nix wäh duad

es große glick
dass ma jedn tog wea sogt
wie geana mi hod

es große glick
dassi ned nochdenkn muaß
obi ma a lewakassemmö
um 2 euro iwahaupt leisten kau

es große glick
wauni siech
dass auf de baam
äh no bladdln wochsn

is da grund
warum i ned
lotto schpü


(novemba 2008)

© bei da elis rotter

i kreu de wänd hoch

asoa plafon
is boid eareicht

und daun foah i
duach de deckn

direkt ins freie

du kaunsd jo daweu weida
im kölla
deine leichn
eibalsamian


(septemba 2008)

i gschpias

wias laungsaum
von untn aufa griacht

wias ma eischiaßt

haaß und koid

de ganslhaut
stöd ma de hoa auf

kaun aun nix
aundas meha denkn

mei fantasie gähd
mit mia duach

i wea imma geila
und geila

jo, jooooooooo

mia kummts glei







es näxte gedicht


(mai 2008)

© by elis rotter

laungsaum, gaunz laungaum
trepfln de ideen
in mei hian eina

auwo bevua no a gedicht
draus wean kennt

sans meist scho wieda
vadunst

(aprü 2008)

© bei da elis rotter

die gaunze zeid hobi glaubt
i briat iwa ana guadn gschicht

bis i gmerkt hob
dass des ei auf dem i sitz
scho zum miachtln aufaungt

(aprü 2008)

© bei da elis rotter

i hob ma mei varuaßts
nudlsieb zamartad

wira klaans nockabazl
bini dogstaundn
und hob auf an
blitz gwoat

owa nedamoi
gstraaft hoda mi


(mäaz 2008)

© bei da elis rotter

aa es öda wean

i siech vüles nimma so schoaf
und hean muaß i aa ned a jedes wuat
maunche kauni afoch ned riachn
und ned ois is noch mein gschmock

i glaub des is, weulimi dafia
jez a bissl bessa gschpia

(Septemba 2007)

© bei da elis rotter

jedn tog
lieg i
mit an waunsinns mau
im bett

ea is a sunsd
aun meina seitn
ea is fuachtboa nett

er is voi schee
dabei isa no gscheid und
sooo belesn

i bin scho laung von kan
so sehr begeistad gwesn

er is total interessant
ea hod charisma
und null geheimnisse
vua mia

jo, sexi isa aa
und wia

trozdem glaubi
weri boid
mid eam
fertig sein

de frog is nua:
wöches biachl
ziagi ma
ois nächstes rein


© bei da elis rotter

(august 2007)

heit schmiad si
des schmoiz
gaunz besondas tiaf
in mei sö

de schmochtfetzn
wickln si
um mei waaches heaz

de oidn hodan
schunkln si
in mei drauriche stimmung

und de balladn
leian si
in mei weches gmiad

i glaub ned
dass aus dem obnd heit
no wos wiad



Übersetzung:

weiche stimmung...

heute schmiert sich
das schmalz
ganz besonders tief
in meine seele

die schmachtfetzen (liebeslieder)
wickeln sich
um mein weiches herz

die alten hadern (gassenhauer)
schunkeln sich
in meine traurige stimmung

und die balladen
leiern sich
in mein verletztes gemüt

ich glaube nicht
dass aus dem abend heute
noch etwas wird


(juli 2007)

© bei da elis