se woin mas
recht mochn

und duan se
z´recht mochn

dabei hobi
mei recht

mit recht
east recht
z´recht

(dezemba 2011)

© bei da elis rotter

zu süwesta
kaunsd knoin
so laut du wüst

do heads
wenichsdns
kana

(dezemba 2011)

© bei da elis rotter

das umsetzen
von vorsätzen
beeinflusst die umsätze

nachsatz:

zumeist jedoch nur
im ersten quartal

(jänner 2005)

© by elis rotter

de mistküwen gengan iwa
de gschiaschpüla san voi
de waumpn gfüüd

de gödbeasln laa

(dezemba 2011)

© bei da elis rotter

jedn freidoch
es söwe

kuules leiwal
kuule frisua
kuule buuts

ea hoit si söwa
fest vaschränkt
in seine oam

sei body zuckt
und windt si

seine fiaß
schdaumpfn
im takt

nua wenna
mid wem
zaumschdässt

mochta kuaz de augn auf

und winscht si
in a aundas
lem

(dezemba 2011)

© bei da elis rotter

de gaunze wöd
is a großa daunzsoi
und es pakett is glott

du muasst gfiad wean
damidsd ned ausrudschd
haums ma dazöhd

du muasst imma wissn
wöcha schritt da nächste is
haums gsogd

auwa i bleib ned sizn
und woat
bis mi ana auffoadat
bis mi ana hoid

i schdäh auf
und i daunz i daunz i daunz

im groos
aufn säeu
am eis

auf de schpizn
blosshappad
oda in schicke
daunzschuach

freistil
und zu jeda musik

i drah mi und drah mi und drah mi

wia wüd

aa wauns mi dabei
imma wieda
aufzahd


(c) bei da elis rotter

dieses gedicht erschiern in der
"morgenschtean" - spezialausgabe
"frauen schtean" zum 100jährigen frauentag