ueber mich...

24
Sep
2014

asoa ziakus…


iagndwea hod man
ins uahwaschl gsetzt
damit i eam
auf jedn foi
huastn hea

greischpad hodasi jo
nua diafad a dabei
wieda auße gfoin sei

(septemba 2014)

© bei da elis

23
Jul
2014

selbständig...


da vuatäeu is:

mia braucht ma
nix audichtn

i reim ma
glei söwa
wos zaum

(c) bei da elis

30
Dez
2011

recht mochn...


se woin mas
recht mochn

und duan se
z´recht mochn

dabei hobi
mei recht

mit recht
east recht
z´recht

(dezemba 2011)

© bei da elis rotter

17
Dez
2011

i daunz...


de gaunze wöd
is a großa daunzsoi
und es pakett is glott

du muasst gfiad wean
damidsd ned ausrudschd
haums ma dazöhd

du muasst imma wissn
wöcha schritt da nächste is
haums gsogd

auwa i bleib ned sizn
und woat
bis mi ana auffoadat
bis mi ana hoid

i schdäh auf
und i daunz i daunz i daunz

im groos
aufn säeu
am eis

auf de schpizn
blosshappad
oda in schicke
daunzschuach

freistil
und zu jeda musik

i drah mi und drah mi und drah mi

wia wüd

aa wauns mi dabei
imma wieda
aufzahd


(c) bei da elis rotter

dieses gedicht erschiern in der
"morgenschtean" - spezialausgabe
"frauen schtean" zum 100jährigen frauentag

14
Jul
2011

san aa nua pfead…


i hob
imma glaubt

des mit de
stutn

is nua
a gerücht

bis is
easchte moi
bissn wuan
bin

(juni 2011)

© bei da elis rotter

30
Jun
2011

ned de sei miaßn...


de dauand wos
zum eakläan
zum heazeign oda
zum faschdeckn hod

ned de sei miaßn

de „drozdem“

so gschickt
so gscheid
so schee
so sexy
so schdoak
so tolarant
so talentiert
so tüchtich

so woswasi wos is

des warad mei anzichs
„besondares bedüafnis“


© bei da elis rotter

26
Jun
2011

bschdeck…


i hob nedamoi
an leffe
ghobt

auf aamoi
gobl i
a freid
auf

und de schneid
is aa wieda do


(juni 2011)

© bei da elis rotter

18
Jun
2011

iwadriwa…


mi haums
hintagaunga
umeghom
iwanumma
owetrogn
aufgmocht
und eineglegt

des hod mi
ned grod
viareghaut

oiso hobi mi
hoid wieda
außezaht
ohbeidlt
zaumgflickt
und uandlich
aufbaut

jez bini
iwadriwa

(juni 2011)

© bei da elis rotter

18
Sep
2010

schreim…


i hoid mi au
aun mein block

i ziag mi auf
aun mein kuli

i brad mi aus
mid meina sö

und fliag

(septemba 2010)

© bei da elis rotter

ois swingt…


a hoata bauchnobl
eigfruahrane suagn
duachhängande feaschn
so bini eina kumma

auße gaunga bini
mit hupfade eiaschdeck
haundwoame bresln
und bladlwaache zechn

(septemba 2010)

© bei da elis rotter
logo-neu

bei da Elis

Buchtipp


elis rotter
hört, es menschelt

Aktuelle Beiträge


elis - 3. Jul, 10:33

elis - 3. Jul, 10:32

elis - 22. Mai, 08:59

elis - 4. Mai, 08:57

elis - 4. Mai, 08:55

Blogs

Besucher

User Status

Du bist nicht angemeldet.

Suche

 

Status

Online seit 4523 Tagen
Zuletzt aktualisiert: 3. Jul, 10:41

Credits

vi knallgrau GmbH

powered by Antville powered by Helma


xml version of this page
xml version of this topic

twoday.net AGB


a intro
beobachtungen
Elis beim Poetry Slam
english
feststellungen
fragen
gemischtes
gschdanzln
haiku
herbstlesung 2005
Herbstlesung 2008
kurzgeschichten
lesung gegen gewalt
liebe
lyrikwettbewerb gewonnen!
sozial-kritisches
... weitere
Profil
Abmelden
Weblog abonnieren