iha heats wåsi red
wissts aa mid wem
waunn und wo

iha lests meine mails
wissts aa aun wen
waunn und wieso

iha passts auf
wås i kauf
sechts
noch wås i lechz
soga am klo
kneißts iha mi å

i waaß
iha måchts eich vo mia
a richtiges büd

då hobi mi no nie
so sicha gfühd


(septemba 2008)

© bei da elis rotter

es rauschn vom meea
es tuckan vom fischaboot
kane zikadn

(septemba 2008)

© bei da elis rotter

es is nämlich
gaunz egal

ob du
mi auschtarrst
peamanent wegschaust
oda ob du
so duasd ois dädasd
gaunz normal schaun

i füh mi
so oda so
von dia
diskriminiad


(august 2007)

© by da elis rotter

geh bitte
hea ma auf mid dena

entschuidige
åwa des is jå ka oat

na danke
soiche brauch i då wiaklich ned

es duad ma laad
åwa es is jå woah


(august 2008)

© bei da elis rotter

maunche haum

dreckiche hoa
dreckiche finganägl
dreckiche untahosn
dreckiche phantasien

und imma
a saubare ausred


(august 2008)

© bei da elis rotter

de wut
schiaßt oft ei
wira hochwossa
in a köllaobteu

duat reißts ollas mid
wos umadum liegd

und wauns daun
wieda zruck gaunga is

schdängan olle
bis zu de knechln
im dreck


(august 2008)

© bei da elis rotter

du waßt ned wöche schpuatoat
du waßt ned wöche kategorie
du waßt ned wöcha gegna

in da politik
gibt’s em ka disziplin


(august 2008)

© bei da elis rotter

i waaß
wennsd di ned vuadrängst

wiasd odrängt
oda in da mittn
zaumdrängt

auwa mia föhd hoid
da draung dazua


(august 2008)

© bei da elis rotter