es große glick
waun ma bewusst wiad
dass ma nix wäh duad

es große glick
dass ma jedn tog wea sogt
wie geana mi hod

es große glick
dassi ned nochdenkn muaß
obi ma a lewakassemmö
um 2 euro iwahaupt leisten kau

es große glick
wauni siech
dass auf de baam
äh no bladdln wochsn

is da grund
warum i ned
lotto schpü


(novemba 2008)

© bei da elis rotter

Die komplette Lesung zum Nachhören auf: www.kulturkugel.at
und ein kleines Video dazu auf: YouTube

waun ma mid ana
enteischung aufaungt
waaß ma, dass ma jez
a gauns a schiache
oabeit vua sich hod

umso scheena is
waumma mid dera scheiß hockn
daun endlich fertich wuan is

(novemba 2008)

© bei da elis rotter

waun ana in da schnö-baun den nothaumma
außareißt und eam - nur zum beispü -
an aundan aufn schädl haud
daun is des missbrauch
und dea wiad bestroft

- Missbrauch wird bestaft!
so stehts aufn pickal vom haumma

waun si ana a packl parkemed kaufd
und de puivaln in sei bia eine schmeißd
damits bessa foahd
daun is des missbrauch
und vua dem wird gewarnt

- Vor Missbrauch wird gewarnt!
so stehts am beipockzettl


und do hauma aa scho es problem:

in ana gsöschoft
in dea ma kinda gebrauchen kau
wira weakzeig oda a verkehrsmittl

do deaf ma si ned wundan
dass a poa oaschlecha glaubn
dass ma kinda aa missbrauchn kau


(novemba 2008)

© bei da elis rotter

maunchmoi denkima

de blindn sähgn
wenigsdns ned
dass augstarrt
wean

owa gspian duansas
woahscheinlich
trotzdem

(novemba 2008)

© bei da elis rotter

wauni deina meinung noch
ned ansehnlich bin

wieso schaust du daun so?

(novemba 2008)

© bei da elis rotter

sie konnte ihn ausnehmend gut ausnehmen
er war von ihrem benehmen benommen
er hatte ihr vergebens vergeben

die untergebenen des unternehmers
sollten sich beim achtgeben in achtnehmen

das abnehmen wurde ihr nicht abgenommen
sie hatte sich beim übergeben übergeben
und beim übernehmen übernommen

der herausgeber hatte sich etwas herausgenommen
sich jedoch beim ausgeben verausgabt

(november 2008)

© by elis rotter