wira scheiße aum schuach
ohne wiesnschtickl

wira rozgleckal
ohne toschntiachl

wira duachfoi
ohne heisl

so is

a vois gackal-sackal
ohne mistkibä


(jänna 2010)

© bei da elis rotter

du kaunsd mi!
du kaunsd mi wiaklich amoi!


freindlich frogn
obi vielleicht zeid fia di hob

du kaunsd mi!

höflich bittn
dassi wos dua fia di

du kaunsd mi gean hom!

und zwoa so, wiaris vadien

und du kaunsd jez

a aundare
umadumkommandian
und fia deppad hoidn


(jänna 2010)

© bei da elis rotter

mei hund is a
frecha hund

mei koda is a
kuula hund

mei bua is a
ohdrada hund

mei oida is a
faula hund

und i bin a
oama hund


(jänna 2010)

© bei da elis rotter

wüvü
kalorien
hot de
karolin
eigendlich
ghabat?


(dezemba 2009)

© bei da elis rotter

waeu i kaan poista hob

streck i mi noch da deckn

owa do san lauta lecha drin

oiso leg i mi aufd kantn

und moch de augn zua


(dezemba 2009)

© bei da elis rotter

voi lustich sein
owa ohne humor

si endlich wos traun
owa ohne gefoah

seha vü zum redn
owa goanix zum sogn

mehrere gänge
owa kaum wos im mogn

uandlich vü saufn
und iwahauptnix vatrogn


(dezemba 2009)

© bei da elis rotter

schdö da vua
a vuabüd
schdöd si
vua

und du
sichsd
nix


(dezemba 2009)

(c) bei da elis rotter