mid schpaß aun da freid
und mid volln elan
kaunsd unguade leid
gaunz locka dazahn

fäeud di wea au
sogsd du: genau!

wü ana schdänkan
duasd mid eam plänkan

kummt da wea bled
riad di des ned

red di wea nieda
sogst: kommen sie wieda!

und in ana schdund
frogsd eam: na und?

aun dia proid ois oh
dia geht nix noh

dafia bist do


(aprü 2010)

© bei da elis rotter

nua ned eigeh
auf nix eigeh

ned wauns de fosd
vaduaschdn
hom lossn

und scho goa ned
waunsd uandlich
eigwassad
wuan bist


(aprü 2010)

© bei da elis rotter

es is im lem
wia in da kiachn

wias amen im gebet

noch ana laungan predigt
wiad nimmameha vü gredt


(aprü 2010)

© bei da elis rotter

es bratal woa groß
seah üppig die soß
zum weghaun is zschod
zum eigfrian is zschpod

i hau ma zua not
es restl aufs brot
i tunks schee ins fett

nua mim gwicht
is a gfrett

(aprü 2010)

(c) bei da elis rotter

es kreiz
es is scho soo oft
varissn wuan

dass boid nimma
lustig is


(aprü 2010)

© bei da elis rotter