warum kau ma aafoch
de augn zua mochn
wauma wos
ned segn wü

owa ned
de nosn eiziagn
waun aan wos
aunschdinkt

und no vüü bedaualicha:

ned de uahn
zuakloppn
waun wea
an schaas redt

(mei 2010)

© bei da elis rotter

unkraut hockn
eadn hockn
hoiz hockn

daun

im goatn
hockn

und no vü
hockn
segn


(mei 2010)

(c) bei da elis rotter

noch an laungan koidn winta

noch ana nocht in dersd
schlechd draamd host

noch an bradn weg im schottn

oder waun da afoch nua
de ganslhaut rennt


duad da easchde schritt
ind sunn

bsundas guad


(aprü 2010)

© bei da elis rotter

liegt auf da stroßn

ka auhnung
wea den
hiegschpuckt hod

muaß owa ana
in an blauzeig
gwesn sei


(aprü 2010)

© bei da elis rotter

i bin bis zum raund
augfühd

ois drahd si

ois grinsd ma
entgegn

de viecha
de pflaunzn
und sogoa
de leid

voi fett


(aprü 2010)

© bei da elis rotter

mid schpaß aun da freid
und mid volln elan
kaunsd unguade leid
gaunz locka dazahn

fäeud di wea au
sogsd du: genau!

wü ana schdänkan
duasd mid eam plänkan

kummt da wea bled
riad di des ned

red di wea nieda
sogst: kommen sie wieda!

und in ana schdund
frogsd eam: na und?

aun dia proid ois oh
dia geht nix noh

dafia bist do


(aprü 2010)

© bei da elis rotter