iagndwea hod man
ins uahwaschl gsetzt
damit i eam
auf jedn foi
huastn hea

greischpad hodasi jo
nua diafad a dabei
wieda auße gfoin sei

(septemba 2014)

© bei da elis

da vuatäeu is:

mia braucht ma
nix audichtn

i reim ma
glei söwa
wos zaum

(c) bei da elis

se woin mas
recht mochn

und duan se
z´recht mochn

dabei hobi
mei recht

mit recht
east recht
z´recht

(dezemba 2011)

© bei da elis rotter

de gaunze wöd
is a großa daunzsoi
und es pakett is glott

du muasst gfiad wean
damidsd ned ausrudschd
haums ma dazöhd

du muasst imma wissn
wöcha schritt da nächste is
haums gsogd

auwa i bleib ned sizn
und woat
bis mi ana auffoadat
bis mi ana hoid

i schdäh auf
und i daunz i daunz i daunz

im groos
aufn säeu
am eis

auf de schpizn
blosshappad
oda in schicke
daunzschuach

freistil
und zu jeda musik

i drah mi und drah mi und drah mi

wia wüd

aa wauns mi dabei
imma wieda
aufzahd


(c) bei da elis rotter

dieses gedicht erschiern in der
"morgenschtean" - spezialausgabe
"frauen schtean" zum 100jährigen frauentag

i hob
imma glaubt

des mit de
stutn

is nua
a gerücht

bis is
easchte moi
bissn wuan
bin

(juni 2011)

© bei da elis rotter

de dauand wos
zum eakläan
zum heazeign oda
zum faschdeckn hod

ned de sei miaßn

de „drozdem“

so gschickt
so gscheid
so schee
so sexy
so schdoak
so tolarant
so talentiert
so tüchtich

so woswasi wos is

des warad mei anzichs
„besondares bedüafnis“


© bei da elis rotter

i hob nedamoi
an leffe
ghobt

auf aamoi
gobl i
a freid
auf

und de schneid
is aa wieda do


(juni 2011)

© bei da elis rotter

mi haums
hintagaunga
umeghom
iwanumma
owetrogn
aufgmocht
und eineglegt

des hod mi
ned grod
viareghaut

oiso hobi mi
hoid wieda
außezaht
ohbeidlt
zaumgflickt
und uandlich
aufbaut

jez bini
iwadriwa

(juni 2011)

© bei da elis rotter

i hoid mi au
aun mein block

i ziag mi auf
aun mein kuli

i brad mi aus
mid meina sö

und fliag

(septemba 2010)

© bei da elis rotter

a hoata bauchnobl
eigfruahrane suagn
duachhängande feaschn
so bini eina kumma

auße gaunga bini
mit hupfade eiaschdeck
haundwoame bresln
und bladlwaache zechn

(septemba 2010)

© bei da elis rotter