Mäaz

beim Billa
Laungsaum schlända i duach de Regale. Aha, da Paprika is in Aktion… Wiebitte? Aktion nennan de des? San de aus Goid oda wos? Na und de Paradeisa eascht, na danke!! Des kennan sa sie ghoidn…Doschau! De große Milka… na des is scho a Aungebot. Do nimm i ma glei zwa… hob äh scho laung nix mehr gnoscht. Naujo, und dea Nussschdrudl doda, dea is owa aa ned teia… head damit. So jez nuameha de Schnitzln, a Bia, de Müch und es Kotznfuada… jez hobi ois…

zaus
So, gschwind de Müch in Eiskostn… de Schocklad… ah wos, do brich i ma glei a Rippal owe… hmmmm… es gähd hoid nix iwa a Noisette. Glei no Schtickl… so, jez owa ins Kastl damid. Gaunz weit hintare. Wie hö dass draußn scho is! I glaub die Heizung brauchi heit nimma aufdrahn. Jez kauman scho riachn, en Frühling… schee is des. Auwo wos is jez los? Wieso gengan denn meine Fiaß scho wieda zu dem Kastl mid da Schocklad?

Aprü

bei da Andrea im Goatn
Wos? An Schokokuchn host gmocht? Pfaui, supa! Jo, kloa… gib ma glei a uandlichs Schtikl… ahhh Niss san aa drin… jo jo… sicha mid Schlogobas, is eh scho wuascht. Sog wie geht’s eigentlich dem Ossi? Host wieda amoi wos ghead von eam? Oiso es is sooo leiwaund, dass ma heit scho im Goatn sitzn kenna… findsd ned?

a Telefongeschpräch
Hallo? Elis am Apparat… Jo seawas Hedi! Wia geht’s? Fein.. jo, gähd äh… na suupa schee is heit… asssoooo… laufn gäh? Du, des is liab vo dia, i woit äh scho de gaunze Zeit wieda amoi, owa grod heit gähds auf goa kann foi. I hob en Edi vaschprochn, dass i eam a Tiramisu moch… und de kumman aa daun nocha zua Jausn… wos? joooo i waß äh… ned bes sei… es näxte moi… gö?

Mei

vuam Gwaundkostn
OK, wöches Leibal ziagi au? Eigentlich kennt i scho des kuaze, enge mid de Schpagettiträga nehma… heit is äh so woam draußn… GÄH BITTEEE, des gibt’s do ned!! Na, unmöglich kauni des auziagn! Schau da des au, iwaroi de Schpekfoitn… komisch… i kaun doch hechstns aaa zwa Kilo zuagnumma haum? Aus is! I muaß wieda aufhean mid dea deppadn Noscharei!!!

beim Billa
oiso am Süßichkeitnregal bini vuabei… pfff…gschofft… dafia nimmi ma glei an gaunzn Sock Karottn mid… fias Feansehn… schmeckn jo aa guad… und gsund sans außadem! a aprozentichs Joghuat, Hoibfettmüch, Knäckebrot… pfau, i bin sowos von stoiz auf mi! Supa… kane Leit bei da Kassa… mim Bankomat bitte…........... äm... ööö... jo…........... de Smartis ghean aa no dazua…

© bei da Elis Rotter