68z´g zentimeta laung woan deine hoa
und jez frisieast da
de letztn 68z´g fedan
vom aan zum aundan oah

68z´g joint hosd graucht
in zwa monat
mainchmoi in aan
jez trinkst deine 68z´g bier
weu drogen vabotn san

68z´g moi haums di bei de demos
wegtrogn miaßn
und jez duasd schee brav
deine 68z´g rosnschteck giaßn

68z´g weiba hosd gschnaxlt
wia waun nix waa
heite zoisd 68z´g euro
fia aamoi alaa

68z´g politische paroln host ghennt
gegns eteblischment

68z´g varuckte büda host gmoint
in 68z´g vaschiedane foabn woasd gschoint

jez host 68z´g dunkle krawattn im schraunk

und des gaunze 68z´ga theata
des mocht di kraunk


(aprü 2008)

© bei da elis rotter

laungsaum, gaunz laungaum
trepfln de ideen
in mei hian eina

auwo bevua no a gedicht
draus wean kennt

sans meist scho wieda
vadunst

(aprü 2008)

© bei da elis rotter

die gaunze zeid hobi glaubt
i briat iwa ana guadn gschicht

bis i gmerkt hob
dass des ei auf dem i sitz
scho zum miachtln aufaungt

(aprü 2008)

© bei da elis rotter

se hom a soa scheens haus
mid an an soan scheen goatn

nua da zaun
schaut scho aus ois wia

(aprü 2008)

© bei da elis rotter



Reimversion:

ka zaunpfahl meah…


se hom an soan scheen goatn
und a soaa scheens haus

nua da zaun
schaut scho aus

east gestan homs wieda
an streit owa brochn

jez wiad a boid
ausanaunda krochn


(aprü 2008)

© bei da elis rotter

i hob ma mei varuaßts
nudlsieb zamartad

wira klaans nockabazl
bini dogstaundn
und hob auf an
blitz gwoat

owa nedamoi
gstraaft hoda mi


(mäaz 2008)

© bei da elis rotter

es is jo ned so
dass i di ned mog

es is nua des muaß
aun aan soan tog

drum wiast aa von mia
ka liabs wuat heite hean

damit du glei meakst:
„I hob di WIAKLICH gean“


(14. februa 2008)

© bei da elis rotter

a
...a
......a
.........a
bst
........bst
...bst
.............bssssssssssst !
rak
........rak rak
......................rakrakrakrakrak
............
..........
...
te te te
teeeeeeeeeeee !


litaratua
is meistns
a bissl

unanschaulich
hobi ghead


(jänna 2008)

© bei da elis rotter