wos mocht ma
wauns fia an schodn
afoch
ka begrenzung
gibt

wauna ausufad
wauna iwa gähd
wauna imma greßa
und greßa wiad

und du danem
a klans zweagal

eam ins aug schaun

des aug is owa
in ana hechn
desd nedamoi
mehr mid ana
lata daglengsd

und du wiasd migrissn
von ana wön
noch da
aundan

no hoidsd di
iagendwie hoid
hoidsd di
es hoit di

hoit!!!

(aprü 2009)

des is ois

a trauagschpü
a drama
a tragödie

vielleicht aa a
tragigkomödie

wea waaß…


na egal

auf jedn foi
sitz i
im foischn
füm

(april 2009)

© bei da elis rotter

hängt ma scho
bei de uahn außa
schimpft da hos

es gäht ma sowos von
aufn keks
am zaga
auf de sockn
am oasch
…

mia gäht’s eigentlich
nua auf de eia
sogt es hendl

(aprü 2009)

© bei da elis rotter

sie sogt:
bitte wehr di doch endlich
loss da ned ois gfoin
du host rechte
du bist stoak

- owa du bist psychisch völlich am saund…

sie sogt:
des gibt’s do ned
dass du afoch
in da eckn sitzn bleibts

dass du di imma nua
duckst

- owa du bist wia gelähmt vua aungst…

sie sogt:
es kaun do ned sei
dass du nie zruckhauts
ned um hüfe schreist

dass du ollas so hinnimmst

- owa du bist innalich scho zabrochn…

sie frogt:
wiaso stähsd du - vadaumt noamoi - ned auf
und duads endlich wos dagegn?

und sie siecht afoch ned
wia miad du bist


(mäaz 2009)

© bei da elis rotter

das opfer fällt nicht weit
vom stamm

von dort rollt es
in die opferrolle

rollt weiter in
die spirale

an deren ende bereits
neue opfer sitzen

dann wird geopfert
oder aufgeopfert

je nachdem


(März 2009)

© by Elis Rotter

ned brodn - ned gsottn
ned guad - und ned schlecht

ka licht - und kane mottn
ned foisch - owa aa ned echt

a poa baam - des is no ka woid
a klans haus - san no laung kane heisa

ned woam - owa aa no ned koid
ka bettla - auwa laung no ka keisa

a bladl ohne wind
a mutta ohne kind
a heisl ohne papier

des san mia, des san mia


nimma gaunz schteu - owa aa no ned floch
a kölla, via wänd – owa no ohne doch

ned goa so oid - auwa aa nimma jung
a scheene schaukl - owa fost ohne schwung

no ned vakauft - owa fost scho varodn
nimma gaunz häu - owa no ohne schodn

a suppn ohne soiz
a gramml ohne schmoiz
a eiskostn ohne bia

des san mia, des san mia


(märz 2009)

© bei da elis rotter