a guada schmäh…
es daboamd ma oft
waun de leit
mid eanare gschroppn
und midn draurichn gsicht
dåknian und de haund aufhoidn
maunchmoi
wauns goa znepft und oam
aus da wäsch schaun
daun gib i eana hoid wås
åba ma kaun si a deischn
leztns, wiari so zua U gäh
då glaubd ana
beim großn tschick-åschnbecha
de stummln zaum
fest eigmummld
mid so haundschuach
wo de finga außa schaun
meingod dea oame,
håb i ma dåchd
schengsd eam an tschick
damida wenichsdns aaamoi
wås gscheids zum rauchn håd
åwa ea, schaud mi gaunz daschrockn au
und sågd: „Oh, verzeihen Sie
gnädige Frau, hier liegt ein Irrtum vor!
Ich bin Nichtraucher! Was sie hier
sehen, ist lediglich das Einsammeln von
Asche, zum Polieren meiner Münzensammlung!
und daun håda ma an vuatråg ghoidn
zwaa davogfåhrane U-bauhnan laung...
iagnwie is scho a waunsinn, wås ana
si ois eifoin låssd, waunasi scheniad
(nowemba 2005)
© bei da elis
elis - 22. Nov, 10:57
1 Kommentar - Kommentar verfassen - 0 Trackbacks
