i schau in ana wichtigen klausur
nua unauffällig
auf mei oambaunduhr

bei dera stundnlaungan
redarei
schlof i a
maunchmoi ei

drum foig i
a ned imma
dem valauf

owa mei bauch
der weckt mi
wieda auf

weu des so
fuachtboa bläht
wauns imma nua
um eitelkeiten geht

kämpf i in mauncha konferenz
mid ana oagn flatulenz


(oktoba 2008)

© bei da elis rotter

i hea di redn
owa wos du sogst
des geht ma ned ei

i siech di duan
owa da sinn davo
dea geht aun mia vuabei

i lies di schreibm
owa fia mi is des ois
nua gehianwixarei

und då kaunsd du
no soa
guada sei


(oktoba 2008)

© bei da elis rotter

wia laung muaß
a duaschtschtreckn sei
dass ma´s wossa
no dareicht

wia laung muaß
a tunnl sei
dass ma am end
no a liacht siecht

wia laung muaß
a leitung sei
bis ma meakt
dass ma drauf schtähd


imma nua so laung
wia ma söwa wü

(septemba 2008)

© bei da elis rotter

zwa viadl
host scho dalebt

jez kaunsd
deine früchte
eantn
jez wiads no amoi
so richtig
bunt
no amoi
a bissl woam
in da sunn

im leztn viadl
is da daun
numeah
koid

(septemba 2008)

© be da elis rotter

maunche haum

dreckiche hoa
dreckiche finganägl
dreckiche untahosn
dreckiche phantasien

und imma
a saubare ausred


(august 2008)

© bei da elis rotter

de wut
schiaßt oft ei
wira hochwossa
in a köllaobteu

duat reißts ollas mid
wos umadum liegd

und wauns daun
wieda zruck gaunga is

schdängan olle
bis zu de knechln
im dreck


(august 2008)

© bei da elis rotter

du waßt ned wöche schpuatoat
du waßt ned wöche kategorie
du waßt ned wöcha gegna

in da politik
gibt’s em ka disziplin


(august 2008)

© bei da elis rotter

i waaß
wennsd di ned vuadrängst

wiasd odrängt
oda in da mittn
zaumdrängt

auwa mia föhd hoid
da draung dazua


(august 2008)

© bei da elis rotter

de wohiplakate
san ned plaka-tiv
sondan nua meha tief

de wohivaschprechn
san nocha ois nua
vaschprecha gwesn

aus de wohiurnen
waht da de oschn
vo de leztn zwa regiarungen
entgegn

de picksiaßn wohizuckaln
vadeam da en mogn


ka wunda
dass se so vü leid
im lokal eanara wohi
nua meha niedasaufn


(august 2008)

© bei da elis rotter

"wer mit sich reden lässt
muss selbst nichts sagen"

(c) bei da elis